TERENGGANU៖ ប៉ូលិសក្នុងរដ្ឋ Terengganu នៃប្រទេសម៉ាឡេស៊ី បានចាប់ខ្លួនវេជ្ជបណ្ឌិតគ្លីនិកឯកជនម្នាក់ ដែលសង្ស័យថាបានចេញប័ណ្ឌដែលបញ្ជាក់ថាបានចាក់វ៉ាក់សាំងកូវីដ-១៩ក្លែងក្លាយ។

មេប៉ូលិសខេត្ត Terengganu លោក Rohaimi Md Isa បាននិយាយថា តាមរយៈការស៊ើបអង្កេតបឋមបានបង្ហាញថា មនុស្សប្រមាណ ១ ៩០០នាក់ត្រូវបានគេរកឃើញថាជាប់ពាក់ព័ន្ធជាមួយគ្លីនិក តែលោកនៅមិនទាន់អាចបញ្ជាក់បានទេថាមានមនុស្សប៉ុន្មាននាក់ដែលមិនបានចាក់វ៉ាក់សាំងប៉ុន្តែបានទទួលបានប័ណ្ឌវ៉ាក់សាំងក្លែងក្លាយ។

គាត់បានប្រាប់អ្នកយកព័ត៌មានថា៖ «សម្រាប់ដែលចង់បានប័ណ្ឌចាក់វ៉ាក់សាំងក្លែងក្លាយនេះត្រូវបង់ប្រាក់ពី៤០០រីងហ្គីត ទៅ៦០០រីងហ្គីតដែលស្មើរនឹង៩៥ដុល្លារ ទៅ១៤៣ដុល្លារ» ។

បន្ថែមពីនេះអ្នកដែលជួយរកភ្ញៀវមកឲ្យគ្លីនីកនឹងទទួលបានកម្រៃជើងសារចំនួន៥០រីងហ្គីត ស្មើរនឹងប្រមាណ១២ដុល្លារដើម្បីផ្សព្វផ្សាយសេវាកម្មរបស់គាត់។

អាជ្ញាធរជឿថាក៏មានប្រជាជនមកពីរដ្ឋផ្សេងក្រៅពី Terengganu ដែលបានទៅធ្វើប័ណ្ឌវ៉ាក់សាំងក្លែងក្លាយនេះផងដែរ៕